Uko abanyamadini bazitwara amadini ya shitani naramuka yemewe mu Rwanda

Add caption

Hashize iminsi mike Ikigo cy’igihugu gishinzwe imiyoborere (RGB) gitangaje ko hari amadini abiri  akorera shitani yasabye kwemerewa gukorera mu Rwanda.

Byabaye nk’amakuru mashya kandi atunguranye mu matwi y’Abanyarwanda, ubusanzwe mu muco wabo bazi ko ibikorwa bya shitani ari ibibi gusa.

Itegeko Nshinga rya Repubulika y’u Rwanda ritanga uburenganzira busesuye bwo gusenga, ari nacyo RGB iheraho ivuga ko nta cyabuza ayo madini kwemererwa gukorera mu Rwanda.

Mu kiganiro aherutse kugirana na IGIHE, Umuyobozi muri RGB ushinzwe imitwe ya Politiki n’imiryango ishingiye ku madini, Aime Barihuta Haba yagize ati “Babibuzwa se kubera iki? Buri muntu afite uburenganzira bwo gusenga icyo ashaka, wowe ni wowe ureba ukavuga ngo nsenga iki, ureba niwe uvuga ngo njye nsenga iki ni iki, undi akavuga ngo iki ni shitani bitewe n’imyememerere ye.”

Byatumye IGIHE iganira n’abayobozi b’amadini atandukanye ,mu Rwanda, bavuga uko bumva bazakorana n’idini rya shitani, ubusanzwe  ayo madini afata nk’umwanzi wabo ukomeye.

 “Shitani ntabwo tuyitinya na Yezu yayitsinze ku musaraba” Kiliziya Gatolika

Kiliziya gatolika ni rimwe mu matorero yageze mu Rwanda mbere, ndetse na n’ubu bigaragarira mu bayoboke benshi ifite.

Rishingiye ku myemerere ya gikrisitu nk’uko n’andi madini menshi mu Rwanda ariyo myemerere afite.

Mu  kiganiro IGIHE yagiranye n’Umuvugizi wa Kliiziya Gatolika mu Rwanda Musenyeri Phillipe Rukamba, yavuze ko Leta ikwiye kureba inyungu idini ya shitani  ifitiye Abanyarwanda, ariko avuga ko nta n’ubwoba ibateye.

Yagize ati: “ Leta ni ukureba abo bantu barashaka kugeza iki ku Banyarwanda.  Leta nibemerera, sinakubwira ngo tuzakora iki, ariko ni ukubireba.Ntabwo tubatinya kuko shitani tuyirwanya buri munsi kandi na Yezu yayitsinze ku musaraba.”

Rukamba avuga ko RGB nibatumira mu nama y’abanyamadini bazagenda kandi bakicarana n’abo bakozi  ba shitani.

“Niba bakorera shitani, twe siyo dukorera, ntitwakorana”ADPR

Rev Past Sibomana Jean, Umuvugizi w’Itorero ADEPR yavuze ko nta byinshi yavuga ayo madini ataremerwa, gusa ngo ntibashobora gukorana .

Yagiz ati: “Niba bakorera satani, twe siyo dukorera, urumva rero ntitwakorana.” Abajijwe niba nta bwoba ko ayo madini yabatwara abayoboke, yavuze ko abashaka kugenda bazagenda bagasigarana n’ababishaka.

“Turamutse dusanze bagamije gusenya, tuzafatanya n’abandi kubamagana” Islam

Urebye idini ya Islam niyo ifite imyemerere isa n’aho itandukanye gato n’iy’andi madini mu Rwanda, kuko yo igendera ku gitabo gitagatifu ‘Korowani’ mu gihe andi madini hafi ya yose agendera kuri Bibiliya.

Umuyobozi wungirije w’umuryango w’Abayisilamu mu Rwanda (RMC) Sheikh Omar Sulaiman Iyakaremye aganira na IGIHE yavuze ko nta kiza shitani igira, kubw’ibyo ngo ibikorwa by’ayo madini ni ukubikurikiranira hafi igihe baba bemerewe gukorera mu Rwanda.

Yagiz ati “Twebwe nk’umuryango wa Islam, urumva niba turwanya shitani twashyigikira uyikorera? Benshi bazi ko shitani ari mbi, ni umwanzi. Nibemererwa tugatumirwa mu nama, ni Leta izaba yabahamagaye si twebwe. Tuzaganira iterambere ariko turamutse dusanze bagamije gusenya, tuzafatanya n’abandi kubamagana.”

“Njye sinzicarana na shitani, ababzanya bzicarane nayo ariko njye ntibishoboka” Bishop Rugagi

Umushumba mukuru w’Itorero Redeemed Gospel Church rikorera mu Rwanda Bishop Innocent Rugagi we avuga ko adateze kwicarana  n’abakorera shitani igihe cyose bazaba bemerewe gukorera mu Rwanda.

Mu kiganiro yagiranye na IGIHE yagize ati: “Tuzi ko akazi ka  satani ari ukwica, kwiba no kurimbura. Niba bayemereye, ni ukuvuga ngo bemeye n’ibikorwa byayo.Leta izabyirengere.Ni nko gufata umurozi ukamushyira iwawe, ngo kuko ntacyo azantwara reka muzane, ariko azica n’abandi”

RGB isanzwe itumira inama n’abanyamadini bakaganira ku ngingo zitandukanye zigamije iterambere. Bishop Rugagi we avuga ko atazasubira muri izo nama igihe cyose zizaba zatumiwemo abakozi ba satani.

Yagize ati: “Njye Bishop Rugagi ntabwo nzicarana na satani muri iyo nama.Bibiliya ivuga ko nta mucyo ubana n’umwijima, bo bazicarane n’abo bakozi ba shitani, natwe abakozi b’Imana badutumire mu nama yacu.”

“Nibadutumira n’umukozi wa satanai nzajyayo, ariko sinzatumira shitani  iwanjye” Rev Past Antoine Rutayisire

Rev Canon Antoine Rutayisire umushumba w’Itorero Angilikani Paruwasi ya Remera, ni umwe mu banyamadini b’inararibonye mu Rwanda.

Avuga ko kwemerera idini rya shitani mu Rwanda abifiteho impungege, cyane cyane ku bijyanye n’uburyo  rizaba rikora bakurikije uko bazi cyangwa bumva shitani ikora.

Yagize ati  “Nibura bizadufasha kumenya  abayisenga (shitani) tubirinde, ariko icyo nanjye mfiteho ikibazo ni uburyo bazajya bakora.Nibamara kubaha uruhushya, Polisi ni ukubacungira hafi ikamenya ibyo bakora.”

Pasiteri Rutayisire avuga ko Leta nibatumira mu nama no mu bindi bikorwa by’iterambere azajyayo, ariko ngo we ntashobora kugira igikorwa atumiramo umuntu ukorera shitani.

Yagize ati: “Nidutumirwa na Leta tuzajyayo. Ni nk’uko iyo tugiye mu muganda duhurirayo n’ibisambo n’abafata ku ngufu, ariko njye nta we nzatumira iwanjye. Wenda bazanshinje gukora segregation (ivangura) , nzamubwira ko segregation yakozwe n’Imana yo yavuze ko nta mwijima ubana n’urumuri.”

Ubusanzwe idini ya shitani izwi cyane muri Amerika, kuko ho ikorera ku mugaragaro ndetse hari abayobozi bayo bazwi.

Yashinzwe mu mwaka wa 1966 na Anton Szandor Lavey ari nawe wari umuyobozi mukuru w’idini. Iryo dini rifite icyicaro Manhattan mu mujyi wa New York. Bagendera kuri Bibiliya bise iya shitani “Satanic Bible) kandi kuba umuyoboke wabo ntabwo bisaba kuba aza gusenga, apfa gukurikiza gusa amahame yanditse muri iyo Bibiliya yabo.

Kuba umuyoboke w’idini rya shitani (iryo ryatangiriye muri Amerika) ugomba kuba ufite imyaka y’ubukure hakurikijwe amategeko y’igihugu  uturukamo. Ntabwo iryo dini rijya ritangaza umubare w’abayoboke rifite, nubwo ryemeza ko abasaba kurijyamo ari benshi.

Biragoye kumenya uko ayo madini ya shitani azakora mu Rwanda, cyane cyane mu bantu bafite imyumvire ibona shitani nk’umugome, kirimbuzi, umwanzi w’abantu.

Uko Abanyamadini bazitwara amadini ya shitani naramuka yemewe mu Rwanda

 IGIHE